Select your Top Menu from wp menus

Keppni lokið á Grand Slam París

GSParis2016Sveinbjörn Iura vann fyrstu viðureign sína gegn Josatek Naulu snemma í morgun á Grand Slam París og mætti næst Roman Moustopoulos frá Grikklandi sem er fyrrum Evrópumeistari juniora og í 14 sæti heimslistans. Sveinbjörn náði ekki að fylgja eftir sigri sínum úr fyrstu umferð en Roman var öllu sterkari í gripunum og þegar viðureignin var um það bil hálfnuð og báðir komnir með tvö shido komst Grikkinn inn í uchimata og sigraði á ippon með glæsilegu kasti og Sveinbjörn þar með dottin úr keppninni. Þetta er í annað skiptið á skömmum tíma sem Sveinbjörn kemst áfram í aðra umferð á Grand Slam móti sem eru nota bene sterkustu mót í heimi fyrir utan HM og Ólympíuleika svo árangur hans lofar góðu.

Þormóður keppti um hádegisbilið og lenti á móti mjög líkamlega sterkum mótherja og þungum (155 kg) Malki El Mehdi frá Marokó. Sá glímdi mjög stíft og passíft og var fastur fyrir. Hvorugur náði að ógna verulega ef frá skilin tvær góðar sóknir hjá Þormóði en hann komst bæði inn í kosoto gari og seionage og kom Malki úr jafnvægi sem snöggvast en það dugði ekki til. Malki sótti að ég held aðeins einu sinni og Þormóður var í raun aldrei í hættu en vítin urðu Þormóði að falli. Báðir fengu shido snemma í glímunni fyrir sóknarleysi og síðan fékk Þormóður shido fyrir að fara út fyrir keppnisvöllinn og annað ekki löngu seinna og þegar um ein mínúta var eftir fékk hann það fjórða og þar með tapaði hann viðureigninni og eins og Sveinbjörn dottinn úr keppninni.