Select your Top Menu from wp menus

Þrjú gull og lið mótsins

Líð mótsins – Holstein Open 2017

Það var glæsilegur árangur hjá okkar mönnum á Holstein Open í dag en við unnum þrjú gull, eitt silfur og  tvenn bronsverðlaun. Þátttakendur komu frá rúmlega tíu þjóðum eins og Hollandi, Danmörku, Ítalíu, Belgíu og að sjálfsögðu Þýskalandi  svo einhver séu nefnd. Gísli Vilborgarson reið á vaðið og innnbyrti fyrsta gullið og var það í -73 kg flokknum. Þar var keppt í tveimur fjögurra mann riðlum og vann Gísli sinn riðil og var þar með kominn í undanúrslitin. Þar vann hann andstæðing sinn öruggt á ippon sem og úrslitaviðureignina. Sveinbjörn Iura og Logi Haraldsson kepptu í -81 kg flokknum og var keppt í einum sex manna riðli, Sveinbjörn vann allar sínar (fimm) viðureignir þar með gullverðlaunin en Logi vann þrjár og endaði með bronsverðlaunin. Í -90 kg flokknum sem var fjölmennastur eða tólf manns var keppt í tveimur sex manna riðlum. Þar vorum við með þrjá keppendur þá Egil Blöndal, Ægir Valsson og Úlf Böðvarsson. Úlfur komst því miður ekki upp úr riðli en bæði Egill og Ægir sem kepptu í sitthvorum riðlinum urðu í öðru sæti síns riðils og komust þar með í undanúrslitin. Þar tapaði Ægir sinni viðureign og endaði í þriðja sæti en Egill vann hinsvegar og komst í úrslita viðureignina en tapaði þar og endaði því með silfrið. Nú var bara einn keppandi eftir hjá okkur og var það Grímur Ívarsson sem keppti í -100 kg flokki þar sem keppendur voru sex. Grímur vann fyrstu fjórar viðureignir sínar og var þar með kominn í úrslit og þar lenti hann í vandræðum. Grímur var kominn undir og búið að skora tvívegis á hann wazaari en Grímur náði ekki að svara fyrir sig og allt stefndi í að hann myndi tapa. Grímur gafst þó ekki upp og sótti stíft en andstæðingur hans var orðinn aðgerðarlítill og kominn í varnarham og það kom honum í koll því hann fékk dæmt á sig refsistig fyrir aðgerðarleysi og þegar hann fékk sitt þriðja refsistig var hann dæmdur úr leik og Grímur stóð uppi sem sigurvegari og var þetta að sögn Jóns Þórs Þórarinssonar landsliðsþjálfara sanngjörn úrslit og mjög vel glímt hjá Grími og skynsamlega. Ekki var öllu lokið hjá okkar mönnum því tilkynnt var að lið Íslands hefði verið valið lið mótsins og kom það þeim skemmtilega á óvart því þeir höfðu ekki haft hugmynd um að slíkt stæði til. Til hamingju með frábæran dag.