Kvennalið Íslands í judo á Smáþjóðaleikunum 2025 í Andorra unnu til bronsverðlauna í liðakeppni kvenna. Við höfum ekki unnið til verðlauna í liðakeppni kvenna síðan 2015 en það voru þær Anna Soffía Víkingsdóttir og Hjördís Ólafsdóttir sem unnu til silfurverðlauna á Smáþjóðaleikunum 2015 á Íslandi.

Kvennaliðið mætti Kýpur í fyrstu umferð og sigraði þær örugglega. Næst mættu þær Mónakó og urðu að sætta sig við ósigur í þeirri viðureign. Þær fóru þá í brons baráttu við Andorra þar sem Eyja Viborg reið á vaðið og tókst á við Alda Babi sem er 34 ára reynslubolti í íþróttinni. Eyja sem varð 16 ára sl. mánudag lét rúmlega tvöfaldan aldursmun ekki stoppa sig og sigraði hana eftir rétt rúmar 2 mínútur með kasti sem skilaði wazaari og náði svo góðu fastataki og kláraði glímuna á því. Eyja vann á sannfærandi hátt og hafði góð tök á glímunni.

Helena Bjarnadóttir fór næst á móti Neus Hernandes í -78kg flokki en Helena keppir venjulega í -63kg flokki og var því að keppa tvo flokka upp fyrir sig. Helena hafði glímuna stutta með því að stoppa sókn og fara þá beint inn í hengingu og kláraði hún glímuna þannig. Glíman tók ekki nema 24 sekúndur og sýndi Helena mikla yfirburði með þessari hengingu líkt og þegar hún vann til bronsverðlauna í einstaklingskeppni þegar hún svæfði mótherja sinn með öflugri hengingu.

Weronika þurfti ekki að stíga á móti sínum andstæðingi þar sem tveir sigrar eru nóg til sigurs.

Kvennastarfið er á uppleið en þetta er í fyrsta sinn sem við vinnum til verðlauna í kvennasveit á Smáþjóðaleikunum. Stelpurnar eru ungar og efnilegar og verður gaman að fylgjast með framgangi þeirra á næstu árum.

Andri Stefánsson, framkvæmdastjóri ÍSÍ og Hafsteinn Pálsson, úr framkvæmdastjórn ÍSÍ mættu til að horfa á bronsbardaga stelpnanna. Hafateinn Pálsson afhenti þeim svo verðlaunin við verðlaunaafhendinguna.